Thursday, September 18, 2008

هذه أنتِ

مغرورة عنيدة بطبعك
وحيدة ضعيفة تملي
ومين شافك مين سمعك
انا زيك لما بتملي
بقفل بابي الموارب

فنانة وواضح في عيونك
انسانة وباين في مشاعرك
اسيرة لشكك وظنونك
دفنتي السر في شعرك
وانا سري دفنته في قالب

أستاذة في علم النفس
تلميذة في مدرسة الوفا
ساكنة في ضلمة أمس
نسيتي معنى الدفا
وتاهت بيكي المراكب

مجنونة وعاشقة جنانك
عاقلة لما بتضعفي
دبلت وردة في بستانك
بكيتي وهي بتختفي
بتفرحي بضحك المقالب

ملكة في عصر الجواري
اميرة في سوق النخاسة
لو شارية انا شاري
لو بايعة تنفض الحراسة
من قصاد المواكب

كتومة وسرك جواكي
لكن فاهمه من صوتك
لو تهويني...أهواكي
وأفهم حتى سكوتك
وأطول النجوم والكواكب

انانية و النية خير
وتقولي الدنيا ظالماكي
لكنك ظالمة كتير
وعايشاها على هواكي
رافضة الحب في قوالب

شابة في سن اليأس
عجوزة بتلعب رياضة
لما تصرخي بيبقى بهمس
لما تبكي..تحسي بسعادة
لو تتمني....تهون المطالب

كدابة لدرجة الاحتراف
باينه طبع وهواية
وصدق عيونك يتشاف
دايما وانتي معايا
زي أستاذ وطالب

ضعيفة في فن الكلام
مختلفة في التعبير
مقدرش أقوى غرام
يجبرك ع التغيير
ببساطة..قطة بمخالب

عارضة أزياء أسطورية
فساتينك من النوع المفتوح
وشئ في عيونك العسلية
بيعلن بكل وضوح
الطبع فيكي غالب

مريضة بحلم اليوتوبيا
خايفة على طول الخط
بتعاني كتير من فوبيا
الغرق على رمل الشط
بتسبحي جوه قارب

أسيرة مشاعر هدامة
جميلة وانتي بتقاومي
وفي وشك علامة
رغم الهزيمة بتبتسمي
مولودة بروح المحارب

فيلسوفة..ضعيفة في التاريخ
نسيتي الماضي ودروسه
غناكي زي الصريخ
وصريخك الغنا بيدوسه
وتدوسي الحب وقت المغارب

خبيرة في فن التناقض
صوابعك تشبه بعضها
شئ قابل وشئ رافض
وأشياء تاه أصلها
حقيقي متعددة المذاهب

غلبانة للي ميعرفكيش
واللي يعرفك يجهلك
متعصبة على مفيش
حتى حروفك بتسألك
عن جرح فوق الحواجب

غريبة الأطوار والهوايات
بتجمعي دموع التماسيح
بتدوري على أي إثبات
ان الديك فعلا بيصيح
لما بيهرب من التعالب

حساسة لدرجه مش عادية
والرقة فوق الوصف
رمز حقيقي للإنسانية
والإحساس البشري والضعف
وبرضو مش عاجب

أنثى أصيلة مأصلة
في الروح والعقل والقد
صابرة كما ام مستحملة
وصبر أيوب يهد
والزمن ماشي ولا راكب ؟

جميلة وجمالك ايه
حسدوكي كل الحلوين
ودايماً تسألك المرايا
عن سر الحزن الدفين
في عيون إيقاعها صاخب

معجبة بمراهقة محيي
منير بالنسبة لك أسطورة
كلامهم يقتل ويحيي
كلامك غنوة مكسورة
على لحن حزين وهارب

Wednesday, September 10, 2008

لحن أغنية فاجرة

مشيت فى الشوارع وسط الطيبين الغلابه
اللى سارح و اللى هايم
واللى مغرم صبابه
مشيت أدور على دوا لجراحهم و جراحي
يمكن الدوا فى الهوا اللى حوالينا
يمكن فى الميا الفايضه علينا
يمكن فى العرق اللى مالي إيدينا
ولا هو وعد إتوعدناه و بعديه إترمينا
فى قلب الشوارع و الحارات
تلقى المساجد جنب البارات
والمؤمن تايه فى الكافر
والخايب تايه فى الشاطر
وأنا كنت زمان شاطر
اليوم بيخلص من غير نهايات
واللى فات من عمرى فات
واللى جاى يدوب سكات
حتى الآهات... سكات
والدم لونه بقى أصفر
واللى قتلك تلاقيه بيصفر
لحن أغنيه فاجره
الفجر بقى المغربيه
البنت كبرت و صارت صبيه
والضعف بقى قوه
والقوه للأغلبيه
وبهيه لسه طلتها بهيه
فى حياتك البقيه
الهمه محنيه
والأيدين محنيه
والكاس بيلف فى الدواير
والراحه معادتش فى السراير
ذنب طاير وذنب حاير
ملوش صاحب
و الأقلام ع المكاتب
بتدبح فى الورق الأصفر
ولسه اللى قتلك بيصفر
لحن أغنيه فاجره
يا ترى ناسيه ولا فاكره
الزمن دوار و دوام الحال محال
والليل غدار و السهر مشوار
والسائل سأل مسئول
عن فعل فعله مفعول
والفاعل كان مجهول
والهادى بيهدى المهتدي
ونفسى يا دنيا نبتدى
ليه كل ما أحلم حلم
قبل ما يبدأ ترفضي
طب حتى بس أتأكدي
ليه ديماً تترددي
ولسه برضو هجيلك
أمشى فى الشوارع
وسط الطيبين الغلابه
اللى صايع و اللى ضايع
واللى غنوته كدابه

Sunday, August 3, 2008

محطة مصر 8

من تاني
جاني المرسال بكلام قليل
قاللي القطر راجع بالليل
في المحطة نون
جريت زي المجنون
وفي قلب الليل والسكون
لمحته جاي من بعيد
دقات قلبي ابتدت تزيد
والرعشة مفارقتش ايدي
وعيوني تقول لدموعي زيدي
قدمي ثبتت في الارض
مش عارف إزاي حسيت
إن الجو فعلا برد
حضنت القطر بعيني
بحاول ادفيه ويدفيني
جاني حضنه في إشارة
وأسئلة في عينيه محتارة
قريت المكتوب على جبيني
وانا واقف مستنيه يجيني
وده كان شئ محال
وانا لسه برضو عاشق
لغربتي والترحال
وهرجع من تاني مكاني
استنى رسالة من المرسال

محطة مصر 7

م القطر جاني مرسال
شايل كلام كتير
يطمني ع الاحوال
ويقولي الصبر جميل
وانا صابر صبر جبال
منتظرة يوم الحساب
وياخدني مرسالك يا قطر
بكلام كتير جذاب
لدنيا مفتاحها الصبر
والزمن هو الابواب
ورغم البعد والمسافات
والبلاد اللي بينا بلاد
أحلامك وأحلامي
زي أفكار بريئة أبكار
أفكار ملهاش أسامي
أفكار ملهاش أسباب
وجاني مرسالك يا قطر
بكلام كتير خلاب
كلام ياخدني بالامر
ويعذبني طول العمر
ويرجعني للسراب
وتاخدني السكك يا قطر
وارجعلك
مستني من تاني مراسيلك
مستنيك يا قطر
مستني أجيلك

Saturday, July 19, 2008

محطة مصر 6

في الضحى ومن بدري
ومع اول شعاع نور صابح يجري
تلقى الخلق في المحطة
ع الرزق تسعى ومبكرة
ع الدنيا بتجري ومبدرة
يغزلوا احلام كتير متنطورة
حلم رايح...حلم جاي
حلم ميت...حلم حي
واللي يدور على حلم ماله زي
وشيالين الحمول والهموم
وسواقين وكمسارية
وخلق ياما رايحة جاية
وناس تايهة ويا ناس صاحية
وغير الدمع ما يدوم
على رصيف المحطة
ويا القطر المسافر
والقطر اللي راجع
وانا وياهم حلمي بالدمع مرسوم
حلم يشبه حلمهم
هم يشبه همهم
انا معاهم انا زيهم
ع المحطة مبكر من قبلهم
هل ترى القطر يرجع يا ناس
ويرجع حلمي وحلمهم
ولا القطر تاه خلاص
ونسيني ونسي اسمهم

Thursday, July 17, 2008



Tuesday, June 24, 2008

محطة مصر 5

ناس المحطة عارفيني
من لهفة عيوني فاهمني
من نظرة عيونهم فاهمهم
صعبت عليهم بايني

سارح ما بينهم يوماتي
ضيفهم الدايم ليلاتي
جوة مني انا سمتهم
وهما سموني المغنواتي

صفارة القطر لحني
الكلام جوة مني دبحني
غنيت وياهم غنوتهم
وبخاف غنوتي تفضحني

من خوف الناس عليا
سألوني ع اللي بيا
بكلام مختصر قلتلهم
مستني في القطر هدية

قالولي القطر راجع
كفاياك م المواجع
حكولي وسمعتهم
وانا زي القطر راجع

Saturday, June 7, 2008

محطة مصر 4

في قلب المحطة
وانا لسه مستني القطر
بيفضل سؤالي
سيدي وموالي
عن عشقي القديم
لغربتي وترحالي
انا بسأل
والاسئلة تملا رصيف المحطة
وتملاني وتحلالي
والقطر اللي سافر من زمان
لو يرجع يجاوب
لو حاله من حالي
لو يرجع م الضحى يناوب
ويقفل بيبان الاسئلة
اللي فاتحة ع البحري
يا أهل بحري
ردوا على سؤالي
انا العاشق يا قطر
انا الكلام والأمر
انا الليل والفجر
وعيون ياما تفوت عليا
يصعب عليهم حالي
لما يبان في عينيا
الشجن ويا رجعة القطر الخالي
انا مروح يا قطر
لكن راجع من تاني
لو غبت عليك شوية
استناني

Thursday, May 29, 2008

واحد في محطة مصر

المرة دي المكان
رصيف تمانية
البطل واقف لوحده
البطلة سابت المشهد
ع الناحية التانية
قطر لسه متحرك
البطل من كتر عنده
لابس احلى ما عنده
وده تأثير الذكرى
ومع إنه لوحده
لكن دايما عامل حسابها
قهوته كالعادة
بيشربها سادة
البطل مستني القطر يرجع
القطر مكمل في طريقه
مش بيسمع
جوه عيون البطل
بتبان نظرة أمل
وجوه عقله غنوة
بيلف ويرجع لوحده
لكنه لسه أمين على وعده
جوه منه أمر
إنه يرجع يوماتي
يستنى القطر

Sunday, May 25, 2008

من تاني محطة مصر

المكان من تاني محطة مصر
المكان المرة دي
بوفيه المحطة
كرسيين حوالين ترابيزة
والترابيزة عليها شنطة
البطل لسه فارس
بس البطلة ساكتة
ودمعتين تحت النضارة
وقلب بينبض بحرارة
وفنجان قهوة بارد
انطفت جواه سيجارة
ع الترابيزة طاقية
قديمة بس هدية
الحوار هيكون تقليدي
كلام عايم في دمعة
لا البطل هيقوله
والبطلة كمان مش سامعة
فنجان القهوة التاني
هيكمل بقية الجملة
الصمت يبتدي يهرب
وصوت الست يقرب
"كل شيء بقضاء"
تتهز ايدين العشاق
يبتدي الفارس يشرب
من عصير خدود الحلوة
"فإن الحظ شاء"
"فإن الحظ شاء"
"فإن الحظ شاء"
وهنا تخلص الغنوة
وتبدأ رحلة الفراق

Thursday, May 15, 2008

في محطة مصر

المكان : محطة مصر
على رصيف قطر اسكندرية
الزمان : الساعة ستة
قبل المغربية بشوية
المناسبة : بداية النهاية
لقصة مش عادية
الأبطال : واحد فنان
وواحدة وحدانية
البطل فارس
والبطلة كانت حورية
اتقابلوا على وش الميا
لقاهم كان صدفة
مقدر ومكتوب عند رب العباد
استسلموا من غير عناد
لكن في الميعاد
استسلموا تاني للبعاد
في الخلفية : موسيقى هادية
وراجل عجوز بيدعي
ربنا يقرب البعيد
ويهدي العنيد
الحوار صامت كالعادة
العيون بتقول بزيادة
القطر ابتدى يصفر
الايدين بتفارق بعضها
الدموع تملا العينين
الساعة بتشاور
ستة ودقيقتين
يتحرك القطر
ويسيب وراه
فارس من غير حصان
وحورية غرقانة في الميا

Monday, May 12, 2008

وجهة نظر

العيون في الاصل بلاد
عيون تحطك...عيون تشيلك
عيون تبيعك...عيون تجيلك
عيون تصونك...عيون تخونك
عيون تخسر وعيون تنتصر
اهي برضو وجهة نظر

الناس في الاصل بحور
يعني ناس صريحة
وناس تلف وتدور
وناس رزينة وهادية
وناس من اقلها...تثور
ناس فاتت وعدت
وناس عليها الدور
وناس قاعدة تنتظر
واهي برضو وجهة نظر

الحب في الاصل طرق
في واحد حب وعام
وواحد حب اوام
والتاني حب وغرق
وتلقى اللي حب بصراحة
واللي بيحب بالراحة
واللي داب وعشق
واللي داب وانكسر
واهي برضو وجهة نظر

الكدب في الاصل نوايا
اللي بيكدب صدفة
واللي بيكدب عشان هواية
واللي بيكدب عشان يعيش
واللي كدب مرة ومات
واللي كدب على نفسه
في المرايا
واللي كدب وكشفه القدر
واهي برضو وجهة نظر

الضحك في الاصل وشوش
وش صافي....وش معكر
وش بشوش
وش تلاقيه لما تنده
ووش متلقاهوش
وش احمر يتوصف
ووش اصفر متوصفوش
ووش تاني زي القمر
واهي برضو وجهة نظر

البكا في الاصل بيوت
بكا يدوم ويعيش
وبكا يموت
بكا يهدك وبكا تهده
بكا يشدك وبكا تشده
وبكا تبنيه وبكا يبنيك
وبكا يتنسي ويفوت
وده بكا بالمختصر
واهي برضو وجهة نظر

Thursday, May 8, 2008

على عودي

على عودي
كلام كتير مجنون
لابس لحن موزون
في غنوة فلكلور
الغنوة عمرها سنين
عمرها من عمري
عمرها من عمر جدودي
على عودي...

على عودي
على عودي يا حبيبتي
غنوة مش عادية
مفيهاش رموشك وعيونك
ولا دمعي اللي غرق خدودي
وانا بشد الوتر
على عودي...

على عودي
احلامي تسبق كلامي
احلامي اللي بجد
وأشوفك مراية
وأشوف نفسي فيكي
وأتمنى الاقيكي
لكني الاقيني
عارف حدودي
على عودي...

على عودي
اوتار للفرح
واوتار للمر
واسأل بحرقة
واسأل بصبر
واسأل واجاوب
عن سبب وجودي
عن سبب جمودي
على عودي...

على عودي
فرحان صوت البحر
والموج بيحضن الصخر
ويبل خدود الغنوة
والموج تملي يتكسر
على سدودي
ولسه اللحن بيرن
على عودي...

على عودي
غنوة بين اتنين
مين جمعهم
من غير ميعاد
اللحن سابق الغنوة
بخطوتين
هتعيش الغنوة
ولا يموتوا الاتنين
في اخر غنوة
على عودي...

Wednesday, April 23, 2008

روبن هود

ياما تاهوا في سحرك ناس
ياما غرقوا في بحرك ناس
كتير مساكين وغلابة
داقوا من نفس الكاس
لكنك للأسف معرفتيش
اني اسد في قلب الغابة
نمر في وسط الديابة
انا حاجة كتير مختلفة
لا تدوب ولا تشتاق
ولا تموت من الفراق
انا روبن هود العشاق
صعيدي ميفوتش التار
فلاح
ولا عمري رضيت بالعار
انا النار...
اللي بتحرق النار
كان لازم تفهمي
اني غيرهم
وان انتي زيهم
مش غيرهم
زي اللي راحوا
ومش فاكرهم
ذنب ناس يخلصوا واحد
وانا واحد....
وانا روبن هود العشاق
انا اسمي...
مش زي بقية الاسماء
انا أستاذ في الوفاء
انا بالنسبة لك نقطة فاصلة
يعني من بعد مني
فصلة....
ومن اول السطر
تعيدي التفكير
في التكوين التقليدي للأشياء
معرفتيش اني واحد كامل
وسط ناس كتير أشلاء
معرفتيش ان انا
روبن هود العشاق
انا درس....
في صورة انسان
انا كلمة....
والكلام مليان
انا الحاضر...
مش اللي كان
اكيد دلوقتي فهمتي
معنى كلمة ذكاء
مع تحياتي...
روبن هود العشاق

Saturday, April 19, 2008

الاوضة الضلمة

ما بلاش السؤال ده
الله يرضى عليكي
غيري بس الموضوع
ربنا يهديكي
بدل ما نسأل ونتكلم
ونتخانق ونتألم
ونتحاور ونتشاور
في حاجات ملهاش إجابات
والسؤال ده بالذات
متنفعش معاه نظرية الاحتمالات
يا إما واحد صحيح
يا كفاية بقى قلة قيمة وتجريح
وخلينا كده حبايب
خلينا نحكي في بكرة
أصل السؤال شكوى وربكة
وأزمة وزحمة
وقلة مزاج وضربة لخمة
إسأليني عن حاجة سهلة
حاجة أعرف أرد عليها
يعني مثلا
بكام كيلو اللحمة
عن حرب فلسطين
عني
او عن الناس التانيين
عن الوحدة...عن اللمة
بس إسأليني بعدل ورحمة
أصل الأسئلة
اوضة ضلمة

Wednesday, April 9, 2008

رباعيات (دويتو مع يامن الجنيدي)

الأوله اهه مشعللة
خلخال وغوايش مدلدلة
قلوب هربت م الصبايا
وقلوب صابرة ومستحملة

و التانية حلق و كردان
مشتاقة للسرحان
تسرح تغني ف الخلا
و يردها التوهان

والتالتة علينا فايتة
بتغني وهيا ساكتة
لو مشيت اتزلزلت الارض
وهيا قدمها ثابتة

الرابعة طراطير ورق و لابسينها
عليها الكلمة اللي حابسينها
مش ضروري تنكتب بالقلم
لكن ضروري نكون حاسينها

والخامسة حكت عن نسمة
عيون عسلي مبتسمة
تحتار كتير في اصلها
يا ترى ده مقدر ولا قسمة

و السادسة بعد الرابعة و الخامسة
ف الهم أصبح و امسى
بعد الملاغية الطويلة
ردّهاله و قاله .......انسى

و السابعة عروسة بحر خمرية
ع الشط مرمية
موسومة بالبسمة
محمومة حنية

والتامنة طيبة مأمنة
على قد ايدنا ومقامنا
سألت ع الحورية
قالوا الحورية...امنة

التاسعة شركسي
كتكوت المناور
محتاج يجادل يحاور
كتبوا كتابه ع الزمن
و شبّكوه بالأساور

والعاشرة من العشرة
رسالة وجاية بشرى
اختار الناس الدهب
ولا تختارش القشرة

Sunday, April 6, 2008

الابن الوسطاني

انا الابن الوسطاني للدنيا
انا الساكن في بيت
في شارع ع الناصية ديا
او في اي حتة تانية
انا التايه في ملجأ أيتام
عمري ما مشيت لقدام
دايما واخدها بالعكس
قصدي واخداني بالعكس
انا مش زعلان...بالعكس
انا اللي بزرع الخير
وتملي يطرح عدس
انا عاشق متغرب
والخطاوي في المشاوير
مهما تبعدني برضو بتقرب
انا السارح في الملكوت
انا بنهج في قلب تابوت
ساكن في بيوت ملهاش سقف
حاير بين ميت سؤال وألف
والاسم شاطر
وانا لسه مازلت حاير
بين التراب والضباب
بضحك على نفسي
وأبدل الحقيقة بالسراب
وأشوف الغش ع الوشوش منقوش
مين سن السكاكين مكان الرموش
مين شافني....مين مشوفتوش
والدموع تملى السواقي
تروي جرح فرح يوم التلاقي
واللي باقي....
اكيد معرفوش
والسؤال
والسؤال نقش حنة على جبيني
هل يغلط مرة ؟
هل تاهت المهرة ؟
هل تتوه المهرة ؟
هل تجيني ؟
والجواب تمنه مدفوع من نن عيني
الجواب جر في ديله سؤال يشجيني
بعد السؤال
التقيت المهرة بتشكيني
والحضن لما مرة ساعني
غنيت
غنيتله اكتر لما باعني
غنيت غنيت غنيت
محدش سمعني
مين حبس الصوت في حنجرة كروان
مين اشتاق للقا
مين نسي الاسم
مين تاه في العنوان
فين راح الحنين
فين راح الحنان
يا شاطر على ضهر الحصان

Wednesday, April 2, 2008

ساعات

ليه يا دنيا ساعات
احيانا يعني ساعات
بنحبك كده ساعات
ساعات بحذر واحباط
وساعات بجرأة وثبات
وتملي نخاف ونحطاط
ونعشق فيكي الغنا
ونعشق فيكي حاجات
واحيانا برضو ساعات
نشوف الوهم بيتولد
جوه حضن السكات
ساعات
وساعات تانية كمان
نرسم الفرحة بالالوان
وبالحزن والدموع أوقات
وساعات
كتير تخوفنا المشاوير
وكتير تاخدنا بالاحضان
والشوك ناعم حرير
وتكالنا على الرحمن
دايما مش ساعات
ساعات نحب الغربة
وساعات كتير نشتاق
لللمة والصحبة
وبنكره الفراق
ولما نتوه في الزحمة
نتلم تاني من غير ميعاد
ساعات يا دنيا وساعات
تفتكري الصابر مات
وساعات برضو ساعات
نفتكر الفرحة بالساعات
في غنوة حزينة بالذات
ساعات يا دنيا ساعات
نتوه ونتلخبط في الأيام
سبت زي حد زي تلات
ساعات يا دنيا وساعات

Tuesday, April 1, 2008

عيونك

في عيونك حاجة كده
مش قادر أوصفها بالظبط
حاجة عاملة زي اللي اسمه ايه ده
حاجة بتشدني من اللي اسمه ايه ده
وترجعني للي اسمه ايه ده التاني
يعني لو قعدت من دلوقتي
للسنة الجاية وانا باشعر
وحتى لو حاولت اكدب وافشر
مش هقدر برضو اعبر
عن اللي اسمه ايه ده
دخلتي جوه اللي اسمه ايه ده اوام
من غير حتى سلام
قصر الكلام
انا حاسس ناحيتك
باللي اسمه ايه ده

Saturday, March 15, 2008

امادو

الدنيا النهاردة فعلا زحمة
من الشغل للبيت
في ساعة ونص
البنطلون بقى واسع عليا
شوفي الساعة ديا
ديه كروس
اتفرجتي امبارح ع الأهلي ؟
لما روحت من يومين
لقيت أبويا بيندهلي
مش عوايده
أخويا محتاج قرشين
ولازم أساعده
الحر بقى فظيع
والشتا طول عمره سريع
على فكرة صحيح
انا بحبك اوي

لقطة الموسم

تخيل معايا كدة
ركز
امحي من دماغك اي صورة
سليمة كانت أو مكسورة
واتفرج ع المشهد ده
انت ماشي لوحدك في البرد
من السجاير ريقك ناشف
ومن الدموع طبعا مش شايف
وطبعا بتفكر فيها
وباعت ملايكة حواليها
تداويها وتشفيها
وتدعيلها بطولة العمر
وفي سرك بتقول
يا رب ليك الأمر
بقالك شهر مشوفتهاش
وحشاك لكن....
منسيتهاش
وواثق طبعا
ان النوم مش بيجيلها
بس عشان انت في بالها
ربنا يحميكوا لبعض
المهم....
انت بتعدي الشارع بالعرض
وبدون مقدمات
ولا سلامات وتحيات
تلاقيها على بعد مترين
بتعدي برضو الشارع
وماسكة ايديه
بايديها الاتنين
.....................................
مش بذمتك
وحياة والدك ووالدتك
دي تبقى لقطة الموسم ؟؟

اعتراف

النهارده بجد لازم اعترف
اني جرحت ياما
وظلمت ياما
ايوة بعترف
مش هتكسف
يا واحد صاحبي
ضايقته وهديته
لما سندت عليه
وانا بحبي
يا واحدة كسرتها
وبيتها الليل
دمعتها على خدها
وعلى حبي ندمتها
يا واحد شتمته وانا سايق
مش هبرر غلطي
ولا اقول مزاجي مكانش رايق
يا قلب قتلته
هزمته كسرته
يا كل واحد كنت ليه الدوا
لكني كالعادة...مررته
يا...ويا.....ويا.....
ليكوا كلكوا
من قلبي حقيقي بقولكوا
انتظروا المزيد

Wednesday, March 12, 2008

لحظة يأس

اقر انا المدعو فلان الفلاني
القاطن في 1 ميدان الخطيئة
ميدان الذنب الاعظم
بإني سبب النكسة
والوكسة
والخيبة والأزمة
وإني سارق هدومي
وسارق الجزمة
وكمان ردمت النيل
وكسرت مناخير ابو الهول
والعاشق رديته قتيل
بعترف وانا المسئول
ان الخط ده تربيتي
واني وشيت بأدهم وبهية
وكمان لوثت الميا
وسرقت جزمة واحد بيصلي في السيدة
وانا اللي قتلت علي
وزرعت السرطان في الارض
ولا من شاف ولا من دري
انا السرقة انا النهب
انا حمار انا كلب
انا الماضي بكل خطاياه
وانا الحاضر بكل سواده

ارتحتوا ؟؟؟

كلمني....شكرا

خلص كل اللي ليكي جوايا
مش قادر اعمل حاجة زيادة
رصيدك فعلا خلص
معادش فيه غير رسالة واحدة بس
كلمني.....شكرا

Monday, March 10, 2008

مش انا

صحيت النهاردة
حاسس اني مش انا
يعني دي مش ضحكتي
والوردة اللي في ايدك مش وردتي

عارفة
انتي كمان مش انتي
شكلك برضو متغير
يمكن نمتي متأخر ؟
ولا انا اللي منمتش كويس
ومش شايف تفاصيلك
تحبي نتقابل ؟
انا ممكن اجيلك

خليها في نفس المكان
ولا اقولك
بلاش
اصلو ذكرياته حلوة
والمرة دي شكلها نكد واحزان
تفتكري احنا اتهزمنا
ولا اتكسرنا
ولا كترت الاحزان
فاكرة زمان ؟
لما انتي كنتي شبهك ؟
كنت بحب شكلك وقتها
كنتي شبه فيلسوفة
محبوسة بين اربع جدران

تشربي ايه ؟
قهوة مظبوط ؟ ولا حاجة ساقعة ؟
خليها ميا
يمكن تدوب الاسية
او ترجع الحنية
اللي راحت وشكلها مش راجعة
انتي معايا ؟
ولا مش سامعة ؟؟

بالمناسبة صحيح
هو اللي فات ده كان جد
ولا مجرد تلميح
؟؟؟؟؟؟............
اصلي مبحبش علامات الاستفهام
عارفة الحب بقى بكام ؟

اقولك على سر
بس مش عايز قر
انا توهت من نفسي
......
اه بجد زي ما بقولك كده
كنت ماشي معايا في الشارع
وفجأة ايدي سابت ايديا
بتلفت حواليا
ملقتنيش
قولت بركة يا جامع
اهو راح مش راجع
بس تخيلي اني وحشتني
اصلي كنت طيب معايا
وبجبلي ورد وهدايا
ولعب اطفال
مانا اصلي كنت عيل وقتها
بس اهي مرحلة وخدت وقتها

من فضلك
الحساب
ده انا نسيت المحفظة
تقريبا انا اخدتها مني
غصب عني
هتحاسبي ؟
.....
طب حاسبي
انا مش قولتلك من بدري
اني

صحيت النهاردة
حاسس اني مش انا

اليس في بلاد العجايب

احتاروا كتير في وصفك
معرفوش يسموكي
وقفوا كتير في صفك
بس توهتيهم وما لقيوكي
حيرتي الحاضر واللي غايب
يا اليس في بلاد العجايب

تملي الدنيا محيراكي
وخداها بعند غريب
وحاجات كتير شغلاكي
عن البعيد والقريب
الحقي بقى من الفرح نايب
با اليس في بلاد العجايب

ليه كده خايفة ومترددة
ده طريقك صافي منور
وحتى الوعود متحددة
بس عايزة اللي يدور
القمر فيكي دايب
يا اليس في بلاد العجايب

حياتك غريبة وانا عارف
راسم ملامحها على كفي
وماشي على خطاها مغمض شايف
والرزق على الله وبيكفي
الحزن والفرح قرايب
يا اليس في بلاد العجايب

امشي مرة ومتتردديش
واسندي على كتف الدنيا
عمرها ما باعت..متخافيش
انسي القلق ولو ثانية
ليه دايما بايعة الحبايب
يا اليس في بلاد العجايب

Friday, March 7, 2008

نافذة على العالم

الليلة انا ملك

ومملكتي حدودها عيونك

وطريقي واضح المعالم

ماهو اصل عيونك

نافذة على العالم


الليلة انا ملك

ومملكتي حدودها الأرض

بخطوط الطول وخطوط العرض

ومعنديش مظلوم ولا ظالم

ماهو اصل عيونك

نافذة على العالم


الليلة انا ملك

ومملكتي حدودها السما

صحيح عاشق غلبان انما

صابر وراضي وحالم

ماهو اصل عيونك

نافذة على العالم


الليلة انا ملك

ومملكتي حدودها جمالك

قلبي غافلني وجالك

وازاي ده حصل

الله هو العالم

ماهو اصل عيونك

نافذة على العالم


الليلة انا ملك

ومملكتي حدودها قوامك

وقلبي معاكي فين ما تروحي

وراكي وقدامك

قالوا عليكي حوا

وقالوا عليا ادم

ماهو اصل عيونك

نافذة على العالم


الليلة انا ملك

ومملكتي حدودها الزمن

وبلمح في عينيكي ضحكة

وانا بس اللي اقدر ع التمن

بحرها غويط وهروح عايم

ماهو اصل عيونك

نافذة على العالم


الليلة انا ملك

ومملكتي حدودها قلبك

انا اكتر واحد حبك

اعرفك بنفسي

وبقولك ع اللي في نفسي

ماهو اصل عيونك

نافذة على العالم


الليلة انا ملك

ومملكتي هي عيونك

وعيونك نافذة على العالم

Tuesday, March 4, 2008

أراجوز

كنت زمان حبوب
ولد صغير عايش
شقي وأرنوب
واراجوز
واسمي فرقع لوز
هوب انط
هوب اطير
هوب ادوس
وارقص واغني ع الزمن
عريان بلبوص

فجأة صبحت عجوز
كركوب
مهيوب
مغلوب
والحب معادش بيرسم قلوب
توهت في السكك والدروب
مع اني امبارح لسه يا دوب
كانوا يقولوا عليا محظوظ

كنت دايس الزمن
والزمن دايسني
حابسه وحابسني
لابسه ولابسني
واما صاحبته
لم صاحبني...وسحبني
ولاعبني
وضربلي بوز
وقاللي مناخيرك قد الكوز
وبعد ما كنت
خفيف لطيف ظريف
صبحت
مخيف سخيف غير شريف

ياللي غيرتيني....
ياما اترجيتك ترحميني
قولتلك
اني بجد...ضعيف

روحلها

نتكلم بقى بلغة البزنس
ويا تكسب يا تفلس
بس اللي يغيظ
واللي بجد يفرس
انك رغم فرحك
لسه برضو عاجز
مش قادر ترقص

ليه الدمع في عيونك دايم
ليه الفرح لسه ضيف خفيف
ومين بنالك الحزن مداين
ده ما دايم
الا وجه لطيف

لما ناديت ع البسمة
جاتلك اوام
كما مكتوبة في القسمة
تمام
كما العبد الطايع في المحراب
كما العاشق ناطر ع الابواب
ولكنك قافل الابواب
طب اضحك عليها ولو مرة
وريها ضحكتك الحرة
جرب تخاويها
اجري نواحيها
روحلها راكب على حصانك
فارس عصرك واوانك
تضمك
تأمك
في صلاة قلب كان ضال...وتايب
تلمك
ويا ضحكة عجوز
او ويا الجمال
في شعر اسود طويل...وسايب

روحلها....مستنياك
وقفالك من بدري بتترجاك
متردهاش حزينة
وابتسملها
واما تلاقيها...
هتلاقيها...بتلقاك

Friday, February 29, 2008

هذا انا

لما حد بيشتمني
بكون مبسوط
بجد...
لأني بحس بجد
ان فيه حد...مهتم بيا


مبحبش المواعيد
عشان كده
تملي
بوصل قبل ميعادي
بنص ساعة


وانا صغير
كنت بطل مصر في السباحة
وده مخليني...
متأكد....
اني هموت....غرقان


لما بحب
بحب اوي
وبجد
وده سببه
ان الخيانة في دمي


انا مؤمن جدا
ومتدين اوي
والدليل اني قبل ما اسكر
بسمي......


بحب جدا البنت المحترمة
المؤدبة
وهي ديه
اللي هتكون مراتي
عشان كده
كل اللي عرفتهم....
منحرفات


كان نفسي
اكون في شهرة مارادونا
وحرفنته
وكل يوم بيمر
بتأكد
ان بيليه
اعظم لاعب في التاريخ


حلمت زمان
اوزع جوايز الاوسكار
غاوي سينما
وبحب اوي
يوسف منصور


مبحبش الارقام الفردية
ولما جيت اشتري
الشقة
اخترتها
في الدور الخامس


سنة بحالها
بحاول اكلمها
ولما جتني الجرأة
قولتلها
مبروك
اصلها كانت اتخطبت


أسفلت الشوارع
بيفكرني بنفسي
ساكت
جامد
صامد
زيي تمام


انا اسمر جدا
اكتر من سواد الليل
بس لو نزلتي الشارع
في ليلة ضلمة
والنور مقطوع
مش هتلاقي حاجة منورة....
غيري


السجاير بتجيب سرطان
والشيشة كمان
ويمكن عشان السبب ده
بالذات
انا من مواليد
برج الأسد


مكرهش في حياتي
قد الزحمة
ومقدرتش ابدا
امشي في الشارع
وهو فاضي


كل احلامي كبيرة
مع اني لسه محققتش
اي حلم فيهم
الا اني لسه
احلامي الجاية
اكبر من اللي فاتت


قالولي قدم السبت
تلقى الحد
وفضلت اقدم....
واقدم.....
واقدم.....
لحد ما الاسبوع كله
بقى سبت....

هتفتكريني ؟؟

هتفتكريني ؟
لما الايام هتيجي عليكي ؟
لما الزمن يجور عليكي ؟
لما الدنيا تديلك ضهرها
لما تحسي بطعم الوحدة
لما تنامي بالليل ودمعتك
نهر النيل على مخدتك
لما اللي اشترتيه يبيعك
لما يدبل ورد ربيعك
لما يتساوى عندك الاحساس بعدمه
لما تدوقي الويل والمه
لما تتوه في النور خطاكي
لما تدوري على الحنية
في لمسة ايديكي لإيديا
لما تدوري على حضني الدافي
عليه ترتاحي وتبكي
لما ترجعي من تاني لوحدك
حزينة مهزومة مكسورة
بالظبط زي ما لاقيتك
هتفتكريني ؟
هتكلميني ؟
هتجيلي تاني ؟
هتفتكري سهري في شوارع الحزن
مع دموعي...صاحبي الوحيد
ويا الشوق والتنهيد
هتفتكري قلبي اللي قتلتيه
ودفنتيه
ومشيتي في جنازته تكتمي ضحكتك
هتفتكري دموعي اللي ياما حايلت فيكي
ولا كل اللي اتحملته عشان ارضيكي
فرحك بنيته على انقاض جرحي
وانتي لا رضيتي ترحمي ولا تسامحي
هتسهري بالليل وحدك
تمسحي دمعة نازلة على خدك
وتسمعي غنوة كانت بتجمعنا
وتتمني لو يوم رجعنا
بس اللي راح مبيرجعش
اصل الزمن اطرش مبيسمعش
هتجري على مكان كنا فيه بنتقابل ؟
يمكن تلاقيني او تشوفي حد شبهي
حتى المكان رافض ومش قابل
هتدوري في صندوق ذكرياتك ؟
على حاجة ترجع اللي فاتك ؟
هترجعي زي القطة تتمحك في صاحبها ؟
هتفتكري كل ده ؟
انا مش هفتكر
مش هفتكرك
هنكرك
زي طفل صغير بيهرب من لعبة كسرها
زي محامي شاطر بيهرب من قضية خسرها
وان سألوني عنك
مش هجاوب
وبسرعة اهرب من سؤالهم
كأني مؤمن بيهرب من ايام كفره
كأني عليل بيهرب من ايام مرضه
هنكر اني في يوم حبيتك
لأني بطبعي نضيف
مليش في القصص والتأليف
وان جم يوصوني عليكي
حتى اسمك مش هفتكره
هسيبك وحدك تدوقي من كاس المر
هطلق سراح نفسي وهبقى من تاني حر
لا دموعك هتأثر فيا
ولا هتكوني تاني ليا
انا خلاص رميتك
ذكرى مرفوضة وملهاش مكان جوايا

ريحة المطر

بحب فيكي ريحة مطر الشتا
لما ينزل يغسل عيون السهرانين
وبحب نظرة من عيون نعسانة
سهرانة في شوارع الحب والحنين

الكون ده كونك
واحلى ما فيكي كونك
جنونك زي كحل عيونك
عيونك القادرين على اجمد قلب
وانا قلبي كان ماشي في حاله وحيد
وقلبي مهوش قادر ولا حديد
انا بس بدوب في عيونك الجراحين

بحب دمعة حزينة في عيونك
نازلة تنور كل القناديل
ولمسة ايد مسروقة
وضحكة طفل لقى اهله التايهين
بعد سنين
عاشها غريب حتى في وحدته

بحبك وبنسى الزمن
مجرد ما المح شبه ضحكة
بحبك ومش مستني مقابل ولا تمن
انا بحب ومش كداب
ولا خايف من العذاب
والحيرة والنار
ولا حواجز ولا اسوار
ولا جرح في اخر المشوار

بحب خصلة شعر طويلة
نازلة تضلل على خدودك
ورموشك شاهدين
وحرفين متلخبطين رايحين جايين
محتارين على شط شفايفك

وبحب الغربة في قلبك التايه
في مدن كتير وعواصم
في الغاز كتير وطلاسم
في قلبي اللي كله مواسم

بحب فيكي الصدق والصراحة
وعيونك الذكية اللماحة
وعيوني الهادية المرتاحة
عشان كدة واكتر من كدة بقولك
خفي عليا....بالراحة

جربت

جربت تنزل في المطرة
لابس نص كم ؟
انا جربت.....
قدرت تعشق مرة
ميت مليون صبية ؟
انا قربت......
عرفت في عز الاسئلة
تهرب من الاسئلة ؟
حاولت تضرب امثلة ؟
انا ضربت....

جربت تخرج
مع ملكة جمال مصر ؟
او تصلي المغرب
قبل العصر ؟
طب وانت رايح تصيف
لبست بالطو صوف ؟
وفي العيد الصغير
حطيت السكر
على فروة الخروف ؟

حبيت واحدة متجوزة ؟
ولا كبيرة ومتعكزة ؟
قعدت تضحك في العزا ؟
وتحط ايدك على وشك
وتحاول تخبي كرشك
ليفضحك....وهكذا ؟

مثلت فيلم مع جيمس دين ؟
ولا حاربت هناك
في حطين ؟
ولا لفيت القصر مرتين
وقلت انا الناصر صلاح الدين

سقيت البقسماط
في الببس ؟
نزلت المدبح
تشتري لبس ؟
وانت بتطلع البطاقة
اخدت اسبوع حبس ؟

قدرت تكون ولا حاجة ؟
انا قدرت
قدرت تاخد جايزة في السماجة
قدرت بعد كل الاسئلة ديه
تعرف يعني ايه سذاجة ؟

النهائي

الصدفة بس
جمعتني بيها في ماتش النهائي
من غير استعداد
ومن غير ما احس
صفر الحكم
وابتدى الماتش
ابتدى الألم
وابتدى اللطش
ابتدى قلبي ينبض
ودي هجمة مرتدة عليا
ولسه عقلي بيرفض
لسة الجراح فيا
الوردة اللي في ايدي
قالت انها جابت اول جول
قبل الماتش ما يبدأ
انا لسه صاحب مبدأ
وخط دفاعي حديدي
الرعشة اللي في ايديني
بتعلن سيطرتها التامة
وخصوصا لما
ظهرت اللمعة في عيني
غلط قلبي
ونطق كلمة
بقالي كتير
فيها بخبي
وده كان التاني
وابتدى الهجوم
بدون رحمة
وفجأة
ابتدت عيني تبكي
والدمع نازل يحكي
والكلمة سابقة الدمع
وكدة بقينا عشرة
ومن تاني الحكم صفر
والغريب ان الميدالية الدهب
كانت من نصيبي

الذل والحرمان

وبعد ما كتبنا
وبعد ما خطبنا
بعد ما رسمنا
وحلمنا
وامنا
رجعنا تاني نقطع في اوراقنا
بعد ما عافرنا
وسافرنا
فجأة رجعنا
معناش غير حيرتنا ودموعنا
بعد ما عبرنا
وانتصرنا
فجأة انكسرنا
اليأس كالعادة زارنا
واحنا لم روحنا
للشمس بروحنا
ولا الليل انتظرنا
عدنا مساجين جراحنا
لا احرار احنا
ولا الزمن اطلق سراحنا
لا حلمنا ولا حتى سرحنا
مين شاف الفرح في روحنا
ده احنا لا جينا ولا حتى روحنا
مين سمع بكانا ونوحنا
لا عمرنا بالسر بوحنا
ولا حدش يوم دري بجروحنا
بحكم الزمن وجزاءه رضينا وسامحنا
ولا قلنا تعبنا ولا اندبحنا
لا بالسكات ارتحنا
ولا في بحر دموعنا سبحنا
لا طلع علينا فجر الحب ولا ع الحب صبحنا
دورنا في ليلنا وصباحنا
اتارينا صبحنا
ضحايا جروحنا

الذل والحرمان شوفنا
لا عمرنا هربنا ولا خوفنا
وكانت ضمة كفوفنا
اقوى ما في صفوفنا
حوالين الحب طوفنا
بس فجأة وقفنا
بصينا لبعض واعترفنا
بأن الحلم عمره ما نصفنا
اتخيلنا الحلم و وصفنا
كان وصف ضعيف وضعفنا
وفي اخر الوصف عرفنا
انه عمره ما كان ضيفنا

لو تفتكري ازاي اتقابلنا
وازاي وافقنا وازاي قبلنا
وليه ضحينا وليه اتنازلنا
وازاي طلعنا وازاي نزلنا
ورغم كل ده لسه برضو مازلنا
اسياد بس الوهم ذاللنا

لو بس اصحى الاقينا نسينا
الطيش ورسينا
على مركب هادية رصينة
و عالجرح قسينا
والفرح مواعدنا مش ناسينا
لكن عمرنا ما حسينا
بفرحة لقا ايدينا
اخدنا من الهم وما ادينا
ورجعنا تاني مدينا
ايدينا وبسرعة مشينا ومدينا
ندور ع الدفا وادينا
لا رجعنا ولا ابتدينا

أول ايام الشتا

اول ما دخلت اوضتي
شميت ريحة مش حلوة
فتحت الشبابيك
رشيت معطر
قلبت الدواليب
رميت الكراكيب
ولسه الريحة زي ما هيا
اتاريها ذكرى منسية
وكانت مرمية
وسط هدوم الشتا



مش لاقي بطاقتي الشخصية
قلبت عليها الدنيا
دورت في المكتب
والمحفظة
تابلوه العربية
لحد لما دورت في الجاكت الجلد
لقيت في جيبه
بدل فاقد
من السنة اللي فاتت



فتحت الجرنال
على صفحة الوفيات
اشوف مين عايش ومين مات
لقيت صورتي في برواز اسود
تحتيها البقاء لله
انا مت يا خلق الله ؟
اتاريه جرنال قديم
من الشتا اللي فات


مديت ايدي في جيب الجاكتة
لقيت ميدالية نص قلب
وكعب
تذكرة ترام
ونص جنيه متطبق اربع
ومفتاح
ونمرة تليفون
بطلبه
لقيته غير متاح


صاحي من النوم جعان
نزلت للبقال بهدومي
طلبت عيش
وجبنة رومي
وشوية طرشي
ومجبتش بسطرمة
عشان جابتلي تسمم
الشتا اللي فات



المطرة نازلة ترخ
كإنها خرطوم المطافي
نازل يروي العطش
او نازل يبخ
في حريقة قايدة بقالها كتير
وكانت بدايتها
الشتا اللي فات


دورت على الروب
والشراب الصوف
لا لقيتهم ولا لقيت الكلام
والحروف
لقيت بس قلب حزين ملهوف
مستني معايا
من الشتا اللي فات


تملي في اول الشتا
بحط بطانية على سريري
واتغطى بلحاف تقيل
وكالعادة بنام زي القتيل
واللحاف مصيره الارض
والنصيحة مصيرها الرفض
والقلوب لسه بردانة
من الشتا اللي فات


قاعد ع القهوة بردان
طلبت فنجان قهوة بالحبهان
وكنت مصمم
وراسي الف سيف
اعوض عشرتين طاولة
اتغلبتهم
الشتا اللي فات


بقالي ساعة بشاور لتاكسي
واقف في عز البرد والعتمة
وحيد...بردان...منسي
واول ما ركبت
لقيت العداد واقف على خمسة واربعين جنيه
ولقيت السواق بيقول
اصله شغال من الشتا اللي فات


انا فين ؟
وايه اللي جابني هنا ؟
الشارع ده انا فاكره
حاسس اني قبل كده مشيته
وبرجلي اكيد خطيته
بس قلبي مقبوض
اكيد عملت فيه حادثة
الشتا اللي فات


الاكل طعمه متغير
الطعمية باردة
والملح فيها زيادة
والمياه معكرة
ماشية فيها دبانة صغيرة
بتعوم من الشتا اللي فات


لقيت نمرة غريبة على تليفوني
اولها واحد صحيح
واخرها صفر جريح
وكمان لقيت رسالة
كلامها مش واضح
بس باين فيه التلميح
مسحتها كالعادة
زي ما عملت الشتا اللي فات


الاصل في الحب...النور
الاصل في الكره....الفجور
واللي بنى مصر
كان في الاصل مكسور
وانا واقف جنبه مبهور
من الشتا اللي فات


هدومي واسعة عليا
وزني قل ييجي ميه
والحزام عايز حزام
والجسم على مقاس الالام
اللي لسه منسية
من الشتا اللي فات

انا مين

طول عمري حاجتين
اسمين
نمرتين
حتى اوضتي فيها سريرين
فرحان وحزين
ضعيف ومتين
خاين وامين
متيور ورزين
وعندي فانلة وكرافتتين
وبدلة وشورتين
من الاخر انا مين
انا واحد ولا اتنين

حتى السؤال بسأله مرتين

شباك

كل اما ادخل اي اوضة
الاقيني جريت على شباكها
ابص ع الشوارع
ع اللي رايح واللي راجع
ع الميادين والنواصي
ع القهاوي والكراسي
ع العماير والضماير
ع الغلبان واللي داير
يمكن باصص مستني الغروب
ويمكن يكون مجرد
نوع من الهروب
ويمكن..... ؟
طب يمكن.... ؟
او يمكن.... ؟
لأ مش ممكن
طب جايز
اكون عايز
اشوف حاجة
محدش قبلي شافها
بنت حلوة
محدش يعرفها
عاكسها واحد وكسفها
او بدور على روح
اعلى م البكا والنوح
او فكرة
انا اول من اكتشفها

وقلل قناوي ع الشباك القبلي
فوق يافطة المأذون اللي كتبلي
وقميص نوم زهري
على حبل غسيل بني
عمال يبعد ويقربلي

لقيتني بدور على قرص الشمس
لقيت عليه يافطة ممنوع اللمس
والقمر رافض يظهر
وبيصرخ: مش مسموح بالهمس

والسحاب طاير في دواير
والسما عتمة والجو كتمة
والبلكونات حايشاها الستاير
والمرور حقيقي في أزمة
ولبانة لزقت في كعب الجزمة
والقد ملتهب وفاير

وريشه طارت من ديل عصفورة
وفيونكة في شعر بنت صغيورة
قعدت اتفرج وانا لسه جمب الشباك
اللي مساميره طلعت مكسورة
ولسه ملقتش اللي بدور عليه
ولسه ياما هبص ع الشباك
واما اشوفه برضو هطلع اجري عليه
كل اما ادخل اي اوضة

زي أخوكي

هعاند وهعافر
هبعد عنك بعيد وهسافر
انا مش قدك ولا قد سجنك
اللي عمره ما فرق
بين مؤمن وكافر

سجنك له باب واحد
للي داخل بس
واللي يفكر يعاود
مش هيلقالك بيبان
بس هيلقى المفتاح

سجنك من غير انوار
ابيض واسود
مش الوان
خوفوني كتير منه
وقالولي زي اوضة الفيران
جواه قلب هيشدك
وبسرعة يقفل وراك
وتختفي حتة الجبنة
ويختفي السجان

سجنك من غير محكمة
حكم مسبق بالحب والحرمان
بس ليك حرية الاختيار
عايز حزنك عادة ولا انهيار...؟؟

حكولي عن سجنك حكايات
اساطير
اشكال والوان
وروايات
وقالولي هتبقى سندباد
وابن بطوطة
وممكن تبقى فطوطة
وحسن ونعيمة
واما نعيمة
نعمين
خلي عليوة
يحكي للحليوة
عن غنوة الحنين

الحكم في سجنك مؤبد
ومتسألش على حيثيات
ولا شاهد نفي
ولا اثبات
وانا مش داخل مش داخل
انا اصلي مجبتش مجموع
يدخلني كلية الدموع
والاحزان
سجنك زحمة ومليان

سجنك خمس نجوم
فطار وعشا
واوضة نوم
بس معييش الحساب
وانتي طبعك قلاب
معلش مش هقدر
اعذريني
حسي بيا
سيبيني
وبلاش تحاسبيني

متشدينيش ارجوكي
واعتبريني زي اخوكي

متيجي نتخانق

متيجي نتخانق مع بعض
ونعترف ولو لمرة واحدة
ان سقف احلامنا هي الارض

يالا قولي انك مش عايزاني
عشان ارد واقولك
انك برضو مش لازماني
وان القضية من الاول خسرانة
وانك على بعدي مش زعلانة
قولي كمان انك ندمانة
وهقولك اني زهقت
ومن كتر خوفي
وقلقي عليكي....تعبت
وانك ضعيفة
والدنيا مش مستاهلة
ودموعك جامدة...مش خفيفة
والحياة من غيرك سهلة
وانك مش حنينة زي ما بتقولي
وانك قاسية
وللحب والوعد ناسية
وتقولي تاني ان مش مقدر
وعلى بعدك بقدر
وهقولك بكل بساطة
في عز الخناق
وعدم الاتفاق
وقبل الفراق
اني بكرهك
من السما للأرض
وان احنا زي السمك والميا
منقدرش نستغنى عن بعض

Thursday, December 20, 2007

احيييه

جيبي اللي فوق مليان
واللي تحت عمران
وفرحان انا مش زعلان
ويشتري كل اللي انا عايزه
ورغيف العيش بنص جنيه
احيييه

سفر وغربة
وعذاب وجراح
وسكك طويلة
مافيهاش افراح
وليالي ضلمة
وايديكي سابت ايديه
احيييه

سكن وعشة وجحر في البدروم
وناس بتنام وناس بتقوم
تقلع هدوم وتلبس هموم
وقلوب بتموت وقلوب بتدوم
ولسه برضو بتتسأل
ازاي وليه
احيييه

البير غويط ملوش قرار
والهوا شديد بس حر نار
واللبس ابيض واللون سمار
والاهانة مكانة
والاسد بقى فار
وراحت الهيبه
ولسة الطيبه
وراح القرار
طب هو في ايه ؟
احيييه

قرب مني
استأمنته
صعب عليا
طمنته
ضحك عليا
سامحته
ولا عمري في يوم هنته
ولسه برضو بقوله
يا صايع يا ابن الايه
احيييه

كفاية

كفاية زهقت
كفاية طهقت
كل يوم نفس الكلام
نفس الالام
نفس الحكاوي
نفس الشكاوي
نفس الاهات
نفس السكات
كله بييجي يشكيلي
ويرمي عليا حموله
و اما في يوم يفرح
الاقيه يعيد نفس الكلام
نفس الاحلام
وانا يوم ما احتاج
لا بلقاهم طبيب
ولا علاج
حتى يوم ما الدنيا بتضحك
وتبان من بعيد الافراح
القاني مضطر برضو
اعيش وياهم في جراح
يا دنيا فيكي حاجة مجنناني
انا ليه متخلقتش وحداني

زهقان

من كام يوم كدة
لقيت نفسي زهقان
قولت انزل الشارع اتمشى
بس لقيته زهقان اكتر مني
قلت اقعد عالقهوة
لقيت ناس بتلعب طاولة
وناس بتلعب كونكان
الكل برضو قاعد زهقان
طلبت فنجان قهوة
بالمستكة والحبهان
جالي بس من غير وش
القهوجي قاللي يا استاذ معلش
متزعلش
انا فاكرك قولت عايز رمان
قلت مفيش بقى غير النيل
والحبيبة قاعدين
لا بزهق حاسين
ولا بالبرد دريانين
لقيت واحد و واحدة
ماشيين
وقعت منهم ضحكة
وصورة وورقة
وسمعت منهم كلمة بتقول
انا زهقان