واحد في محطة مصر

المرة دي المكان
رصيف تمانية
البطل واقف لوحده
البطلة سابت المشهد
ع الناحية التانية
قطر لسه متحرك
البطل من كتر عنده
لابس احلى ما عنده
وده تأثير الذكرى
ومع إنه لوحده
لكن دايما عامل حسابها
قهوته كالعادة
بيشربها سادة
البطل مستني القطر يرجع
القطر مكمل في طريقه
مش بيسمع
جوه عيون البطل
بتبان نظرة أمل
وجوه عقله غنوة
بيلف ويرجع لوحده
لكنه لسه أمين على وعده
جوه منه أمر
إنه يرجع يوماتي
يستنى القطر

من تاني محطة مصر

المكان من تاني محطة مصر
المكان المرة دي
بوفيه المحطة
كرسيين حوالين ترابيزة
والترابيزة عليها شنطة
البطل لسه فارس
بس البطلة ساكتة
ودمعتين تحت النضارة
وقلب بينبض بحرارة
وفنجان قهوة بارد
انطفت جواه سيجارة
ع الترابيزة طاقية
قديمة بس هدية
الحوار هيكون تقليدي
كلام عايم في دمعة
لا البطل هيقوله
والبطلة كمان مش سامعة
فنجان القهوة التاني
هيكمل بقية الجملة
الصمت يبتدي يهرب
وصوت الست يقرب
"كل شيء بقضاء"
تتهز ايدين العشاق
يبتدي الفارس يشرب
من عصير خدود الحلوة
"فإن الحظ شاء"
"فإن الحظ شاء"
"فإن الحظ شاء"
وهنا تخلص الغنوة
وتبدأ رحلة الفراق

في محطة مصر

المكان : محطة مصر
على رصيف قطر اسكندرية
الزمان : الساعة ستة
قبل المغربية بشوية
المناسبة : بداية النهاية
لقصة مش عادية
الأبطال : واحد فنان
وواحدة وحدانية
البطل فارس
والبطلة كانت حورية
اتقابلوا على وش الميا
لقاهم كان صدفة
مقدر ومكتوب عند رب العباد
استسلموا من غير عناد
لكن في الميعاد
استسلموا تاني للبعاد
في الخلفية : موسيقى هادية
وراجل عجوز بيدعي
ربنا يقرب البعيد
ويهدي العنيد
الحوار صامت كالعادة
العيون بتقول بزيادة
القطر ابتدى يصفر
الايدين بتفارق بعضها
الدموع تملا العينين
الساعة بتشاور
ستة ودقيقتين
يتحرك القطر
ويسيب وراه
فارس من غير حصان
وحورية غرقانة في الميا

وجهة نظر

العيون في الاصل بلاد
عيون تحطك...عيون تشيلك
عيون تبيعك...عيون تجيلك
عيون تصونك...عيون تخونك
عيون تخسر وعيون تنتصر
اهي برضو وجهة نظر

الناس في الاصل بحور
يعني ناس صريحة
وناس تلف وتدور
وناس رزينة وهادية
وناس من اقلها...تثور
ناس فاتت وعدت
وناس عليها الدور
وناس قاعدة تنتظر
واهي برضو وجهة نظر

الحب في الاصل طرق
في واحد حب وعام
وواحد حب اوام
والتاني حب وغرق
وتلقى اللي حب بصراحة
واللي بيحب بالراحة
واللي داب وعشق
واللي داب وانكسر
واهي برضو وجهة نظر

الكدب في الاصل نوايا
اللي بيكدب صدفة
واللي بيكدب عشان هواية
واللي بيكدب عشان يعيش
واللي كدب مرة ومات
واللي كدب على نفسه
في المرايا
واللي كدب وكشفه القدر
واهي برضو وجهة نظر

الضحك في الاصل وشوش
وش صافي....وش معكر
وش بشوش
وش تلاقيه لما تنده
ووش متلقاهوش
وش احمر يتوصف
ووش اصفر متوصفوش
ووش تاني زي القمر
واهي برضو وجهة نظر

البكا في الاصل بيوت
بكا يدوم ويعيش
وبكا يموت
بكا يهدك وبكا تهده
بكا يشدك وبكا تشده
وبكا تبنيه وبكا يبنيك
وبكا يتنسي ويفوت
وده بكا بالمختصر
واهي برضو وجهة نظر

على عودي

على عودي
كلام كتير مجنون
لابس لحن موزون
في غنوة فلكلور
الغنوة عمرها سنين
عمرها من عمري
عمرها من عمر جدودي
على عودي...

على عودي
على عودي يا حبيبتي
غنوة مش عادية
مفيهاش رموشك وعيونك
ولا دمعي اللي غرق خدودي
وانا بشد الوتر
على عودي...

على عودي
احلامي تسبق كلامي
احلامي اللي بجد
وأشوفك مراية
وأشوف نفسي فيكي
وأتمنى الاقيكي
لكني الاقيني
عارف حدودي
على عودي...

على عودي
اوتار للفرح
واوتار للمر
واسأل بحرقة
واسأل بصبر
واسأل واجاوب
عن سبب وجودي
عن سبب جمودي
على عودي...

على عودي
فرحان صوت البحر
والموج بيحضن الصخر
ويبل خدود الغنوة
والموج تملي يتكسر
على سدودي
ولسه اللحن بيرن
على عودي...

على عودي
غنوة بين اتنين
مين جمعهم
من غير ميعاد
اللحن سابق الغنوة
بخطوتين
هتعيش الغنوة
ولا يموتوا الاتنين
في اخر غنوة
على عودي...