الابن الوسطاني

انا الابن الوسطاني للدنيا
انا الساكن في بيت
في شارع ع الناصية ديا
او في اي حتة تانية
انا التايه في ملجأ أيتام
عمري ما مشيت لقدام
دايما واخدها بالعكس
قصدي واخداني بالعكس
انا مش زعلان...بالعكس
انا اللي بزرع الخير
وتملي يطرح عدس
انا عاشق متغرب
والخطاوي في المشاوير
مهما تبعدني برضو بتقرب
انا السارح في الملكوت
انا بنهج في قلب تابوت
ساكن في بيوت ملهاش سقف
حاير بين ميت سؤال وألف
والاسم شاطر
وانا لسه مازلت حاير
بين التراب والضباب
بضحك على نفسي
وأبدل الحقيقة بالسراب
وأشوف الغش ع الوشوش منقوش
مين سن السكاكين مكان الرموش
مين شافني....مين مشوفتوش
والدموع تملى السواقي
تروي جرح فرح يوم التلاقي
واللي باقي....
اكيد معرفوش
والسؤال
والسؤال نقش حنة على جبيني
هل يغلط مرة ؟
هل تاهت المهرة ؟
هل تتوه المهرة ؟
هل تجيني ؟
والجواب تمنه مدفوع من نن عيني
الجواب جر في ديله سؤال يشجيني
بعد السؤال
التقيت المهرة بتشكيني
والحضن لما مرة ساعني
غنيت
غنيتله اكتر لما باعني
غنيت غنيت غنيت
محدش سمعني
مين حبس الصوت في حنجرة كروان
مين اشتاق للقا
مين نسي الاسم
مين تاه في العنوان
فين راح الحنين
فين راح الحنان
يا شاطر على ضهر الحصان