روبن هود

ياما تاهوا في سحرك ناس
ياما غرقوا في بحرك ناس
كتير مساكين وغلابة
داقوا من نفس الكاس
لكنك للأسف معرفتيش
اني اسد في قلب الغابة
نمر في وسط الديابة
انا حاجة كتير مختلفة
لا تدوب ولا تشتاق
ولا تموت من الفراق
انا روبن هود العشاق
صعيدي ميفوتش التار
فلاح
ولا عمري رضيت بالعار
انا النار...
اللي بتحرق النار
كان لازم تفهمي
اني غيرهم
وان انتي زيهم
مش غيرهم
زي اللي راحوا
ومش فاكرهم
ذنب ناس يخلصوا واحد
وانا واحد....
وانا روبن هود العشاق
انا اسمي...
مش زي بقية الاسماء
انا أستاذ في الوفاء
انا بالنسبة لك نقطة فاصلة
يعني من بعد مني
فصلة....
ومن اول السطر
تعيدي التفكير
في التكوين التقليدي للأشياء
معرفتيش اني واحد كامل
وسط ناس كتير أشلاء
معرفتيش ان انا
روبن هود العشاق
انا درس....
في صورة انسان
انا كلمة....
والكلام مليان
انا الحاضر...
مش اللي كان
اكيد دلوقتي فهمتي
معنى كلمة ذكاء
مع تحياتي...
روبن هود العشاق

الاوضة الضلمة

ما بلاش السؤال ده
الله يرضى عليكي
غيري بس الموضوع
ربنا يهديكي
بدل ما نسأل ونتكلم
ونتخانق ونتألم
ونتحاور ونتشاور
في حاجات ملهاش إجابات
والسؤال ده بالذات
متنفعش معاه نظرية الاحتمالات
يا إما واحد صحيح
يا كفاية بقى قلة قيمة وتجريح
وخلينا كده حبايب
خلينا نحكي في بكرة
أصل السؤال شكوى وربكة
وأزمة وزحمة
وقلة مزاج وضربة لخمة
إسأليني عن حاجة سهلة
حاجة أعرف أرد عليها
يعني مثلا
بكام كيلو اللحمة
عن حرب فلسطين
عني
او عن الناس التانيين
عن الوحدة...عن اللمة
بس إسأليني بعدل ورحمة
أصل الأسئلة
اوضة ضلمة

رباعيات (دويتو مع يامن الجنيدي)

الأوله اهه مشعللة
خلخال وغوايش مدلدلة
قلوب هربت م الصبايا
وقلوب صابرة ومستحملة

و التانية حلق و كردان
مشتاقة للسرحان
تسرح تغني ف الخلا
و يردها التوهان

والتالتة علينا فايتة
بتغني وهيا ساكتة
لو مشيت اتزلزلت الارض
وهيا قدمها ثابتة

الرابعة طراطير ورق و لابسينها
عليها الكلمة اللي حابسينها
مش ضروري تنكتب بالقلم
لكن ضروري نكون حاسينها

والخامسة حكت عن نسمة
عيون عسلي مبتسمة
تحتار كتير في اصلها
يا ترى ده مقدر ولا قسمة

و السادسة بعد الرابعة و الخامسة
ف الهم أصبح و امسى
بعد الملاغية الطويلة
ردّهاله و قاله .......انسى

و السابعة عروسة بحر خمرية
ع الشط مرمية
موسومة بالبسمة
محمومة حنية

والتامنة طيبة مأمنة
على قد ايدنا ومقامنا
سألت ع الحورية
قالوا الحورية...امنة

التاسعة شركسي
كتكوت المناور
محتاج يجادل يحاور
كتبوا كتابه ع الزمن
و شبّكوه بالأساور

والعاشرة من العشرة
رسالة وجاية بشرى
اختار الناس الدهب
ولا تختارش القشرة

الابن الوسطاني

انا الابن الوسطاني للدنيا
انا الساكن في بيت
في شارع ع الناصية ديا
او في اي حتة تانية
انا التايه في ملجأ أيتام
عمري ما مشيت لقدام
دايما واخدها بالعكس
قصدي واخداني بالعكس
انا مش زعلان...بالعكس
انا اللي بزرع الخير
وتملي يطرح عدس
انا عاشق متغرب
والخطاوي في المشاوير
مهما تبعدني برضو بتقرب
انا السارح في الملكوت
انا بنهج في قلب تابوت
ساكن في بيوت ملهاش سقف
حاير بين ميت سؤال وألف
والاسم شاطر
وانا لسه مازلت حاير
بين التراب والضباب
بضحك على نفسي
وأبدل الحقيقة بالسراب
وأشوف الغش ع الوشوش منقوش
مين سن السكاكين مكان الرموش
مين شافني....مين مشوفتوش
والدموع تملى السواقي
تروي جرح فرح يوم التلاقي
واللي باقي....
اكيد معرفوش
والسؤال
والسؤال نقش حنة على جبيني
هل يغلط مرة ؟
هل تاهت المهرة ؟
هل تتوه المهرة ؟
هل تجيني ؟
والجواب تمنه مدفوع من نن عيني
الجواب جر في ديله سؤال يشجيني
بعد السؤال
التقيت المهرة بتشكيني
والحضن لما مرة ساعني
غنيت
غنيتله اكتر لما باعني
غنيت غنيت غنيت
محدش سمعني
مين حبس الصوت في حنجرة كروان
مين اشتاق للقا
مين نسي الاسم
مين تاه في العنوان
فين راح الحنين
فين راح الحنان
يا شاطر على ضهر الحصان

ساعات

ليه يا دنيا ساعات
احيانا يعني ساعات
بنحبك كده ساعات
ساعات بحذر واحباط
وساعات بجرأة وثبات
وتملي نخاف ونحطاط
ونعشق فيكي الغنا
ونعشق فيكي حاجات
واحيانا برضو ساعات
نشوف الوهم بيتولد
جوه حضن السكات
ساعات
وساعات تانية كمان
نرسم الفرحة بالالوان
وبالحزن والدموع أوقات
وساعات
كتير تخوفنا المشاوير
وكتير تاخدنا بالاحضان
والشوك ناعم حرير
وتكالنا على الرحمن
دايما مش ساعات
ساعات نحب الغربة
وساعات كتير نشتاق
لللمة والصحبة
وبنكره الفراق
ولما نتوه في الزحمة
نتلم تاني من غير ميعاد
ساعات يا دنيا وساعات
تفتكري الصابر مات
وساعات برضو ساعات
نفتكر الفرحة بالساعات
في غنوة حزينة بالذات
ساعات يا دنيا ساعات
نتوه ونتلخبط في الأيام
سبت زي حد زي تلات
ساعات يا دنيا وساعات

عيونك

في عيونك حاجة كده
مش قادر أوصفها بالظبط
حاجة عاملة زي اللي اسمه ايه ده
حاجة بتشدني من اللي اسمه ايه ده
وترجعني للي اسمه ايه ده التاني
يعني لو قعدت من دلوقتي
للسنة الجاية وانا باشعر
وحتى لو حاولت اكدب وافشر
مش هقدر برضو اعبر
عن اللي اسمه ايه ده
دخلتي جوه اللي اسمه ايه ده اوام
من غير حتى سلام
قصر الكلام
انا حاسس ناحيتك
باللي اسمه ايه ده

امادو

الدنيا النهاردة فعلا زحمة
من الشغل للبيت
في ساعة ونص
البنطلون بقى واسع عليا
شوفي الساعة ديا
ديه كروس
اتفرجتي امبارح ع الأهلي ؟
لما روحت من يومين
لقيت أبويا بيندهلي
مش عوايده
أخويا محتاج قرشين
ولازم أساعده
الحر بقى فظيع
والشتا طول عمره سريع
على فكرة صحيح
انا بحبك اوي

لقطة الموسم

تخيل معايا كدة
ركز
امحي من دماغك اي صورة
سليمة كانت أو مكسورة
واتفرج ع المشهد ده
انت ماشي لوحدك في البرد
من السجاير ريقك ناشف
ومن الدموع طبعا مش شايف
وطبعا بتفكر فيها
وباعت ملايكة حواليها
تداويها وتشفيها
وتدعيلها بطولة العمر
وفي سرك بتقول
يا رب ليك الأمر
بقالك شهر مشوفتهاش
وحشاك لكن....
منسيتهاش
وواثق طبعا
ان النوم مش بيجيلها
بس عشان انت في بالها
ربنا يحميكوا لبعض
المهم....
انت بتعدي الشارع بالعرض
وبدون مقدمات
ولا سلامات وتحيات
تلاقيها على بعد مترين
بتعدي برضو الشارع
وماسكة ايديه
بايديها الاتنين
.....................................
مش بذمتك
وحياة والدك ووالدتك
دي تبقى لقطة الموسم ؟؟

اعتراف

النهارده بجد لازم اعترف
اني جرحت ياما
وظلمت ياما
ايوة بعترف
مش هتكسف
يا واحد صاحبي
ضايقته وهديته
لما سندت عليه
وانا بحبي
يا واحدة كسرتها
وبيتها الليل
دمعتها على خدها
وعلى حبي ندمتها
يا واحد شتمته وانا سايق
مش هبرر غلطي
ولا اقول مزاجي مكانش رايق
يا قلب قتلته
هزمته كسرته
يا كل واحد كنت ليه الدوا
لكني كالعادة...مررته
يا...ويا.....ويا.....
ليكوا كلكوا
من قلبي حقيقي بقولكوا
انتظروا المزيد

لحظة يأس

اقر انا المدعو فلان الفلاني
القاطن في 1 ميدان الخطيئة
ميدان الذنب الاعظم
بإني سبب النكسة
والوكسة
والخيبة والأزمة
وإني سارق هدومي
وسارق الجزمة
وكمان ردمت النيل
وكسرت مناخير ابو الهول
والعاشق رديته قتيل
بعترف وانا المسئول
ان الخط ده تربيتي
واني وشيت بأدهم وبهية
وكمان لوثت الميا
وسرقت جزمة واحد بيصلي في السيدة
وانا اللي قتلت علي
وزرعت السرطان في الارض
ولا من شاف ولا من دري
انا السرقة انا النهب
انا حمار انا كلب
انا الماضي بكل خطاياه
وانا الحاضر بكل سواده

ارتحتوا ؟؟؟

كلمني....شكرا

خلص كل اللي ليكي جوايا

مش قادر اعمل حاجة زيادة

رصيدك فعلا خلص

معادش فيه غير رسالة واحدة بس

كلمني.....شكرا

مش انا

صحيت النهاردة
حاسس اني مش انا
يعني دي مش ضحكتي
والوردة اللي في ايدك مش وردتي

عارفة
انتي كمان مش انتي
شكلك برضو متغير
يمكن نمتي متأخر ؟
ولا انا اللي منمتش كويس
ومش شايف تفاصيلك
تحبي نتقابل ؟
انا ممكن اجيلك

خليها في نفس المكان
ولا اقولك
بلاش
اصلو ذكرياته حلوة
والمرة دي شكلها نكد واحزان
تفتكري احنا اتهزمنا
ولا اتكسرنا
ولا كترت الاحزان
فاكرة زمان ؟
لما انتي كنتي شبهك ؟
كنت بحب شكلك وقتها
كنتي شبه فيلسوفة
محبوسة بين اربع جدران

تشربي ايه ؟
قهوة مظبوط ؟ ولا حاجة ساقعة ؟
خليها ميا
يمكن تدوب الاسية
او ترجع الحنية
اللي راحت وشكلها مش راجعة
انتي معايا ؟
ولا مش سامعة ؟؟

بالمناسبة صحيح
هو اللي فات ده كان جد
ولا مجرد تلميح
؟؟؟؟؟؟............
اصلي مبحبش علامات الاستفهام
عارفة الحب بقى بكام ؟

اقولك على سر
بس مش عايز قر
انا توهت من نفسي
......
اه بجد زي ما بقولك كده
كنت ماشي معايا في الشارع
وفجأة ايدي سابت ايديا
بتلفت حواليا
ملقتنيش
قولت بركة يا جامع
اهو راح مش راجع
بس تخيلي اني وحشتني
اصلي كنت طيب معايا
وبجبلي ورد وهدايا
ولعب اطفال
مانا اصلي كنت عيل وقتها
بس اهي مرحلة وخدت وقتها

من فضلك
الحساب
ده انا نسيت المحفظة
تقريبا انا اخدتها مني
غصب عني
هتحاسبي ؟
.....
طب حاسبي
انا مش قولتلك من بدري
اني

صحيت النهاردة
حاسس اني مش انا

اليس في بلاد العجايب

احتاروا كتير في وصفك
معرفوش يسموكي
وقفوا كتير في صفك
بس توهتيهم وما لقيوكي
حيرتي الحاضر واللي غايب
يا اليس في بلاد العجايب

تملي الدنيا محيراكي
وخداها بعند غريب
وحاجات كتير شغلاكي
عن البعيد والقريب
الحقي بقى من الفرح نايب
با اليس في بلاد العجايب

ليه كده خايفة ومترددة
ده طريقك صافي منور
وحتى الوعود متحددة
بس عايزة اللي يدور
القمر فيكي دايب
يا اليس في بلاد العجايب

حياتك غريبة وانا عارف
راسم ملامحها على كفي
وماشي على خطاها مغمض شايف
والرزق على الله وبيكفي
الحزن والفرح قرايب
يا اليس في بلاد العجايب

امشي مرة ومتتردديش
واسندي على كتف الدنيا
عمرها ما باعت..متخافيش
انسي القلق ولو ثانية
ليه دايما بايعة الحبايب
يا اليس في بلاد العجايب

نافذة على العالم

الليلة انا ملك

ومملكتي حدودها عيونك

وطريقي واضح المعالم

ماهو اصل عيونك

نافذة على العالم

الليلة انا ملك

ومملكتي حدودها الأرض

بخطوط الطول وخطوط العرض

ومعنديش مظلوم ولا ظالم

ماهو اصل عيونك

نافذة على العالم

الليلة انا ملك

ومملكتي حدودها السما

صحيح عاشق غلبان انما

صابر وراضي وحالم

ماهو اصل عيونك

نافذة على العالم

الليلة انا ملك

ومملكتي حدودها جمالك

قلبي غافلني وجالك

وازاي ده حصل

الله هو العالم

ماهو اصل عيونك

نافذة على العالم

الليلة انا ملك

ومملكتي حدودها قوامك

وقلبي معاكي فين ما تروحي

وراكي وقدامك

قالوا عليكي حوا

وقالوا عليا ادم

ماهو اصل عيونك

نافذة على العالم

الليلة انا ملك

ومملكتي حدودها الزمن

وبلمح في عينيكي ضحكة

وانا بس اللي اقدر ع التمن

بحرها غويط وهروح عايم

ماهو اصل عيونك

نافذة على العالم

الليلة انا ملك

ومملكتي حدودها قلبك

انا اكتر واحد حبك

اعرفك بنفسي

وبقولك ع اللي في نفسي

ماهو اصل عيونك

نافذة على العالم

الليلة انا ملك

ومملكتي هي عيونك

وعيونك نافذة على العالم

أراجوز

كنت زمان حبوب
ولد صغير عايش
شقي وأرنوب
واراجوز
واسمي فرقع لوز
هوب انط
هوب اطير
هوب ادوس
وارقص واغني ع الزمن
عريان بلبوص

فجأة صبحت عجوز
كركوب
مهيوب
مغلوب
والحب معادش بيرسم قلوب
توهت في السكك والدروب
مع اني امبارح لسه يا دوب
كانوا يقولوا عليا محظوظ

كنت دايس الزمن
والزمن دايسني
حابسه وحابسني
لابسه ولابسني
واما صاحبته
لم صاحبني...وسحبني
ولاعبني
وضربلي بوز
وقاللي مناخيرك قد الكوز
وبعد ما كنت
خفيف لطيف ظريف
صبحت
مخيف سخيف غير شريف

ياللي غيرتيني....
ياما اترجيتك ترحميني
قولتلك
اني بجد...ضعيف

روحلها

نتكلم بقى بلغة البزنس
ويا تكسب يا تفلس
بس اللي يغيظ
واللي بجد يفرس
انك رغم فرحك
لسه برضو عاجز
مش قادر ترقص

ليه الدمع في عيونك دايم
ليه الفرح لسه ضيف خفيف
ومين بنالك الحزن مداين
ده ما دايم
الا وجه لطيف

لما ناديت ع البسمة
جاتلك اوام
كما مكتوبة في القسمة
تمام
كما العبد الطايع في المحراب
كما العاشق ناطر ع الابواب
ولكنك قافل الابواب
طب اضحك عليها ولو مرة
وريها ضحكتك الحرة
جرب تخاويها
اجري نواحيها
روحلها راكب على حصانك
فارس عصرك واوانك
تضمك
تأمك
في صلاة قلب كان ضال...وتايب
تلمك
ويا ضحكة عجوز
او ويا الجمال
في شعر اسود طويل...وسايب

روحلها....مستنياك
وقفالك من بدري بتترجاك
متردهاش حزينة
وابتسملها
واما تلاقيها...
هتلاقيها...بتلقاك

هذا انا

لما حد بيشتمني
بكون مبسوط
بجد...
لأني بحس بجد
ان فيه حد...مهتم بيا


مبحبش المواعيد
عشان كده
تملي
بوصل قبل ميعادي
بنص ساعة


وانا صغير
كنت بطل مصر في السباحة
وده مخليني...
متأكد....
اني هموت....غرقان


لما بحب
بحب اوي
وبجد
وده سببه
ان الخيانة في دمي


انا مؤمن جدا
ومتدين اوي
والدليل اني قبل ما اسكر
بسمي......


بحب جدا البنت المحترمة
المؤدبة
وهي ديه
اللي هتكون مراتي
عشان كده
كل اللي عرفتهم....
منحرفات


كان نفسي
اكون في شهرة مارادونا
وحرفنته
وكل يوم بيمر
بتأكد
ان بيليه
اعظم لاعب في التاريخ


حلمت زمان
اوزع جوايز الاوسكار
غاوي سينما
وبحب اوي
يوسف منصور


مبحبش الارقام الفردية
ولما جيت اشتري
الشقة
اخترتها
في الدور الخامس


سنة بحالها
بحاول اكلمها
ولما جتني الجرأة
قولتلها
مبروك
اصلها كانت اتخطبت


أسفلت الشوارع
بيفكرني بنفسي
ساكت
جامد
صامد
زيي تمام


انا اسمر جدا
اكتر من سواد الليل
بس لو نزلتي الشارع
في ليلة ضلمة
والنور مقطوع
مش هتلاقي حاجة منورة....
غيري


السجاير بتجيب سرطان
والشيشة كمان
ويمكن عشان السبب ده
بالذات
انا من مواليد
برج الأسد


مكرهش في حياتي
قد الزحمة
ومقدرتش ابدا
امشي في الشارع
وهو فاضي


كل احلامي كبيرة
مع اني لسه محققتش
اي حلم فيهم
الا اني لسه
احلامي الجاية
اكبر من اللي فاتت


قالولي قدم السبت
تلقى الحد
وفضلت اقدم....
واقدم.....
واقدم.....
لحد ما الاسبوع كله
بقى سبت....

هتفتكريني ؟؟

هتفتكريني ؟
لما الايام هتيجي عليكي ؟
لما الزمن يجور عليكي ؟
لما الدنيا تديلك ضهرها
لما تحسي بطعم الوحدة
لما تنامي بالليل ودمعتك
نهر النيل على مخدتك
لما اللي اشترتيه يبيعك
لما يدبل ورد ربيعك
لما يتساوى عندك الاحساس بعدمه
لما تدوقي الويل والمه
لما تتوه في النور خطاكي
لما تدوري على الحنية
في لمسة ايديكي لإيديا
لما تدوري على حضني الدافي
عليه ترتاحي وتبكي
لما ترجعي من تاني لوحدك
حزينة مهزومة مكسورة
بالظبط زي ما لاقيتك
هتفتكريني ؟
هتكلميني ؟
هتجيلي تاني ؟
هتفتكري سهري في شوارع الحزن
مع دموعي...صاحبي الوحيد
ويا الشوق والتنهيد
هتفتكري قلبي اللي قتلتيه
ودفنتيه
ومشيتي في جنازته تكتمي ضحكتك
هتفتكري دموعي اللي ياما حايلت فيكي
ولا كل اللي اتحملته عشان ارضيكي
فرحك بنيته على انقاض جرحي
وانتي لا رضيتي ترحمي ولا تسامحي
هتسهري بالليل وحدك
تمسحي دمعة نازلة على خدك
وتسمعي غنوة كانت بتجمعنا
وتتمني لو يوم رجعنا
بس اللي راح مبيرجعش
اصل الزمن اطرش مبيسمعش
هتجري على مكان كنا فيه بنتقابل ؟
يمكن تلاقيني او تشوفي حد شبهي
حتى المكان رافض ومش قابل
هتدوري في صندوق ذكرياتك ؟
على حاجة ترجع اللي فاتك ؟
هترجعي زي القطة تتمحك في صاحبها ؟
هتفتكري كل ده ؟
انا مش هفتكر
مش هفتكرك
هنكرك
زي طفل صغير بيهرب من لعبة كسرها
زي محامي شاطر بيهرب من قضية خسرها
وان سألوني عنك
مش هجاوب
وبسرعة اهرب من سؤالهم
كأني مؤمن بيهرب من ايام كفره
كأني عليل بيهرب من ايام مرضه
هنكر اني في يوم حبيتك
لأني بطبعي نضيف
مليش في القصص والتأليف
وان جم يوصوني عليكي
حتى اسمك مش هفتكره
هسيبك وحدك تدوقي من كاس المر
هطلق سراح نفسي وهبقى من تاني حر
لا دموعك هتأثر فيا
ولا هتكوني تاني ليا
انا خلاص رميتك
ذكرى مرفوضة وملهاش مكان جوايا

ريحة المطر

بحب فيكي ريحة مطر الشتا
لما ينزل يغسل عيون السهرانين
وبحب نظرة من عيون نعسانة
سهرانة في شوارع الحب والحنين

الكون ده كونك
واحلى ما فيكي كونك
جنونك زي كحل عيونك
عيونك القادرين على اجمد قلب
وانا قلبي كان ماشي في حاله وحيد
وقلبي مهوش قادر ولا حديد
انا بس بدوب في عيونك الجراحين

بحب دمعة حزينة في عيونك
نازلة تنور كل القناديل
ولمسة ايد مسروقة
وضحكة طفل لقى اهله التايهين
بعد سنين
عاشها غريب حتى في وحدته

بحبك وبنسى الزمن
مجرد ما المح شبه ضحكة
بحبك ومش مستني مقابل ولا تمن
انا بحب ومش كداب
ولا خايف من العذاب
والحيرة والنار
ولا حواجز ولا اسوار
ولا جرح في اخر المشوار

بحب خصلة شعر طويلة
نازلة تضلل على خدودك
ورموشك شاهدين
وحرفين متلخبطين رايحين جايين
محتارين على شط شفايفك

وبحب الغربة في قلبك التايه
في مدن كتير وعواصم
في الغاز كتير وطلاسم
في قلبي اللي كله مواسم

بحب فيكي الصدق والصراحة
وعيونك الذكية اللماحة
وعيوني الهادية المرتاحة
عشان كدة واكتر من كدة بقولك
خفي عليا....بالراحة

جربت

جربت تنزل في المطرة
لابس نص كم ؟
انا جربت.....
قدرت تعشق مرة
ميت مليون صبية ؟
انا قربت......
عرفت في عز الاسئلة
تهرب من الاسئلة ؟
حاولت تضرب امثلة ؟
انا ضربت....

جربت تخرج
مع ملكة جمال مصر ؟
او تصلي المغرب
قبل العصر ؟
طب وانت رايح تصيف
لبست بالطو صوف ؟
وفي العيد الصغير
حطيت السكر
على فروة الخروف ؟

حبيت واحدة متجوزة ؟
ولا كبيرة ومتعكزة ؟
قعدت تضحك في العزا ؟
وتحط ايدك على وشك
وتحاول تخبي كرشك
ليفضحك....وهكذا ؟

مثلت فيلم مع جيمس دين ؟
ولا حاربت هناك
في حطين ؟
ولا لفيت القصر مرتين
وقلت انا الناصر صلاح الدين

سقيت البقسماط
في الببس ؟
نزلت المدبح
تشتري لبس ؟
وانت بتطلع البطاقة
اخدت اسبوع حبس ؟

قدرت تكون ولا حاجة ؟
انا قدرت
قدرت تاخد جايزة في السماجة
قدرت بعد كل الاسئلة ديه
تعرف يعني ايه سذاجة ؟

النهائي

الصدفة بس
جمعتني بيها في ماتش النهائي
من غير استعداد
ومن غير ما احس
صفر الحكم
وابتدى الماتش
ابتدى الألم
وابتدى اللطش
ابتدى قلبي ينبض
ودي هجمة مرتدة عليا
ولسه عقلي بيرفض
لسة الجراح فيا
الوردة اللي في ايدي
قالت انها جابت اول جول
قبل الماتش ما يبدأ
انا لسه صاحب مبدأ
وخط دفاعي حديدي
الرعشة اللي في ايديني
بتعلن سيطرتها التامة
وخصوصا لما
ظهرت اللمعة في عيني
غلط قلبي
ونطق كلمة
بقالي كتير
فيها بخبي
وده كان التاني
وابتدى الهجوم
بدون رحمة
وفجأة
ابتدت عيني تبكي
والدمع نازل يحكي
والكلمة سابقة الدمع
وكدة بقينا عشرة
ومن تاني الحكم صفر
والغريب ان الميدالية الدهب
كانت من نصيبي

الذل والحرمان

وبعد ما كتبنا
وبعد ما خطبنا
بعد ما رسمنا
وحلمنا
وامنا
رجعنا تاني نقطع في اوراقنا
بعد ما عافرنا
وسافرنا
فجأة رجعنا
معناش غير حيرتنا ودموعنا
بعد ما عبرنا
وانتصرنا
فجأة انكسرنا
اليأس كالعادة زارنا
واحنا لم روحنا
للشمس بروحنا
ولا الليل انتظرنا
عدنا مساجين جراحنا
لا احرار احنا
ولا الزمن اطلق سراحنا
لا حلمنا ولا حتى سرحنا
مين شاف الفرح في روحنا
ده احنا لا جينا ولا حتى روحنا
مين سمع بكانا ونوحنا
لا عمرنا بالسر بوحنا
ولا حدش يوم دري بجروحنا
بحكم الزمن وجزاءه رضينا وسامحنا
ولا قلنا تعبنا ولا اندبحنا
لا بالسكات ارتحنا
ولا في بحر دموعنا سبحنا
لا طلع علينا فجر الحب ولا ع الحب صبحنا
دورنا في ليلنا وصباحنا
اتارينا صبحنا
ضحايا جروحنا

الذل والحرمان شوفنا
لا عمرنا هربنا ولا خوفنا
وكانت ضمة كفوفنا
اقوى ما في صفوفنا
حوالين الحب طوفنا
بس فجأة وقفنا
بصينا لبعض واعترفنا
بأن الحلم عمره ما نصفنا
اتخيلنا الحلم و وصفنا
كان وصف ضعيف وضعفنا
وفي اخر الوصف عرفنا
انه عمره ما كان ضيفنا

لو تفتكري ازاي اتقابلنا
وازاي وافقنا وازاي قبلنا
وليه ضحينا وليه اتنازلنا
وازاي طلعنا وازاي نزلنا
ورغم كل ده لسه برضو مازلنا
اسياد بس الوهم ذاللنا

لو بس اصحى الاقينا نسينا
الطيش ورسينا
على مركب هادية رصينة
و عالجرح قسينا
والفرح مواعدنا مش ناسينا
لكن عمرنا ما حسينا
بفرحة لقا ايدينا
اخدنا من الهم وما ادينا
ورجعنا تاني مدينا
ايدينا وبسرعة مشينا ومدينا
ندور ع الدفا وادينا
لا رجعنا ولا ابتدينا

أول ايام الشتا

اول ما دخلت اوضتي
شميت ريحة مش حلوة
فتحت الشبابيك
رشيت معطر
قلبت الدواليب
رميت الكراكيب
ولسه الريحة زي ما هيا
اتاريها ذكرى منسية
وكانت مرمية
وسط هدوم الشتا



مش لاقي بطاقتي الشخصية
قلبت عليها الدنيا
دورت في المكتب
والمحفظة
تابلوه العربية
لحد لما دورت في الجاكت الجلد
لقيت في جيبه
بدل فاقد
من السنة اللي فاتت



فتحت الجرنال
على صفحة الوفيات
اشوف مين عايش ومين مات
لقيت صورتي في برواز اسود
تحتيها البقاء لله
انا مت يا خلق الله ؟
اتاريه جرنال قديم
من الشتا اللي فات


مديت ايدي في جيب الجاكتة
لقيت ميدالية نص قلب
وكعب
تذكرة ترام
ونص جنيه متطبق اربع
ومفتاح
ونمرة تليفون
بطلبه
لقيته غير متاح


صاحي من النوم جعان
نزلت للبقال بهدومي
طلبت عيش
وجبنة رومي
وشوية طرشي
ومجبتش بسطرمة
عشان جابتلي تسمم
الشتا اللي فات



المطرة نازلة ترخ
كإنها خرطوم المطافي
نازل يروي العطش
او نازل يبخ
في حريقة قايدة بقالها كتير
وكانت بدايتها
الشتا اللي فات


دورت على الروب
والشراب الصوف
لا لقيتهم ولا لقيت الكلام
والحروف
لقيت بس قلب حزين ملهوف
مستني معايا
من الشتا اللي فات


تملي في اول الشتا
بحط بطانية على سريري
واتغطى بلحاف تقيل
وكالعادة بنام زي القتيل
واللحاف مصيره الارض
والنصيحة مصيرها الرفض
والقلوب لسه بردانة
من الشتا اللي فات


قاعد ع القهوة بردان
طلبت فنجان قهوة بالحبهان
وكنت مصمم
وراسي الف سيف
اعوض عشرتين طاولة
اتغلبتهم
الشتا اللي فات


بقالي ساعة بشاور لتاكسي
واقف في عز البرد والعتمة
وحيد...بردان...منسي
واول ما ركبت
لقيت العداد واقف على خمسة واربعين جنيه
ولقيت السواق بيقول
اصله شغال من الشتا اللي فات


انا فين ؟
وايه اللي جابني هنا ؟
الشارع ده انا فاكره
حاسس اني قبل كده مشيته
وبرجلي اكيد خطيته
بس قلبي مقبوض
اكيد عملت فيه حادثة
الشتا اللي فات


الاكل طعمه متغير
الطعمية باردة
والملح فيها زيادة
والمياه معكرة
ماشية فيها دبانة صغيرة
بتعوم من الشتا اللي فات


لقيت نمرة غريبة على تليفوني
اولها واحد صحيح
واخرها صفر جريح
وكمان لقيت رسالة
كلامها مش واضح
بس باين فيه التلميح
مسحتها كالعادة
زي ما عملت الشتا اللي فات


الاصل في الحب...النور
الاصل في الكره....الفجور
واللي بنى مصر
كان في الاصل مكسور
وانا واقف جنبه مبهور
من الشتا اللي فات


هدومي واسعة عليا
وزني قل ييجي ميه
والحزام عايز حزام
والجسم على مقاس الالام
اللي لسه منسية
من الشتا اللي فات

انا مين

طول عمري حاجتين
اسمين
نمرتين
حتى اوضتي فيها سريرين
فرحان وحزين
ضعيف ومتين
خاين وامين
متيور ورزين
وعندي فانلة وكرافتتين
وبدلة وشورتين
من الاخر انا مين
انا واحد ولا اتنين

حتى السؤال بسأله مرتين

شباك

كل اما ادخل اي اوضة
الاقيني جريت على شباكها
ابص ع الشوارع
ع اللي رايح واللي راجع
ع الميادين والنواصي
ع القهاوي والكراسي
ع العماير والضماير
ع الغلبان واللي داير
يمكن باصص مستني الغروب
ويمكن يكون مجرد
نوع من الهروب
ويمكن..... ؟
طب يمكن.... ؟
او يمكن.... ؟
لأ مش ممكن
طب جايز
اكون عايز
اشوف حاجة
محدش قبلي شافها
بنت حلوة
محدش يعرفها
عاكسها واحد وكسفها
او بدور على روح
اعلى م البكا والنوح
او فكرة
انا اول من اكتشفها

وقلل قناوي ع الشباك القبلي
فوق يافطة المأذون اللي كتبلي
وقميص نوم زهري
على حبل غسيل بني
عمال يبعد ويقربلي

لقيتني بدور على قرص الشمس
لقيت عليه يافطة ممنوع اللمس
والقمر رافض يظهر
وبيصرخ: مش مسموح بالهمس

والسحاب طاير في دواير
والسما عتمة والجو كتمة
والبلكونات حايشاها الستاير
والمرور حقيقي في أزمة
ولبانة لزقت في كعب الجزمة
والقد ملتهب وفاير

وريشه طارت من ديل عصفورة
وفيونكة في شعر بنت صغيورة
قعدت اتفرج وانا لسه جمب الشباك
اللي مساميره طلعت مكسورة
ولسه ملقتش اللي بدور عليه
ولسه ياما هبص ع الشباك
واما اشوفه برضو هطلع اجري عليه
كل اما ادخل اي اوضة

زي أخوكي

هعاند وهعافر
هبعد عنك بعيد وهسافر
انا مش قدك ولا قد سجنك
اللي عمره ما فرق
بين مؤمن وكافر

سجنك له باب واحد
للي داخل بس
واللي يفكر يعاود
مش هيلقالك بيبان
بس هيلقى المفتاح

سجنك من غير انوار
ابيض واسود
مش الوان
خوفوني كتير منه
وقالولي زي اوضة الفيران
جواه قلب هيشدك
وبسرعة يقفل وراك
وتختفي حتة الجبنة
ويختفي السجان

سجنك من غير محكمة
حكم مسبق بالحب والحرمان
بس ليك حرية الاختيار
عايز حزنك عادة ولا انهيار...؟؟

حكولي عن سجنك حكايات
اساطير
اشكال والوان
وروايات
وقالولي هتبقى سندباد
وابن بطوطة
وممكن تبقى فطوطة
وحسن ونعيمة
واما نعيمة
نعمين
خلي عليوة
يحكي للحليوة
عن غنوة الحنين

الحكم في سجنك مؤبد
ومتسألش على حيثيات
ولا شاهد نفي
ولا اثبات
وانا مش داخل مش داخل
انا اصلي مجبتش مجموع
يدخلني كلية الدموع
والاحزان
سجنك زحمة ومليان

سجنك خمس نجوم
فطار وعشا
واوضة نوم
بس معييش الحساب
وانتي طبعك قلاب
معلش مش هقدر
اعذريني
حسي بيا
سيبيني
وبلاش تحاسبيني

متشدينيش ارجوكي
واعتبريني زي اخوكي

متيجي نتخانق

متيجي نتخانق مع بعض
ونعترف ولو لمرة واحدة
ان سقف احلامنا هي الارض

يالا قولي انك مش عايزاني
عشان ارد واقولك
انك برضو مش لازماني
وان القضية من الاول خسرانة
وانك على بعدي مش زعلانة
قولي كمان انك ندمانة
وهقولك اني زهقت
ومن كتر خوفي
وقلقي عليكي....تعبت
وانك ضعيفة
والدنيا مش مستاهلة
ودموعك جامدة...مش خفيفة
والحياة من غيرك سهلة
وانك مش حنينة زي ما بتقولي
وانك قاسية
وللحب والوعد ناسية
وتقولي تاني ان مش مقدر
وعلى بعدك بقدر
وهقولك بكل بساطة
في عز الخناق
وعدم الاتفاق
وقبل الفراق
اني بكرهك
من السما للأرض
وان احنا زي السمك والميا
منقدرش نستغنى عن بعض

احيييه

جيبي اللي فوق مليان
واللي تحت عمران
وفرحان انا مش زعلان
ويشتري كل اللي انا عايزه
ورغيف العيش بنص جنيه
احيييه

سفر وغربة
وعذاب وجراح
وسكك طويلة
مافيهاش افراح
وليالي ضلمة
وايديكي سابت ايديه
احيييه

سكن وعشة وجحر في البدروم
وناس بتنام وناس بتقوم
تقلع هدوم وتلبس هموم
وقلوب بتموت وقلوب بتدوم
ولسه برضو بتتسأل
ازاي وليه
احيييه

البير غويط ملوش قرار
والهوا شديد بس حر نار
واللبس ابيض واللون سمار
والاهانة مكانة
والاسد بقى فار
وراحت الهيبه
ولسة الطيبه
وراح القرار
طب هو في ايه ؟
احيييه

قرب مني
استأمنته
صعب عليا
طمنته
ضحك عليا
سامحته
ولا عمري في يوم هنته
ولسه برضو بقوله
يا صايع يا ابن الايه
احيييه

كفاية

كفاية زهقت
كفاية طهقت
كل يوم نفس الكلام
نفس الالام
نفس الحكاوي
نفس الشكاوي
نفس الاهات
نفس السكات
كله بييجي يشكيلي
ويرمي عليا حموله
و اما في يوم يفرح
الاقيه يعيد نفس الكلام
نفس الاحلام
وانا يوم ما احتاج
لا بلقاهم طبيب
ولا علاج
حتى يوم ما الدنيا بتضحك
وتبان من بعيد الافراح
القاني مضطر برضو
اعيش وياهم في جراح
يا دنيا فيكي حاجة مجنناني
انا ليه متخلقتش وحداني

زهقان

من كام يوم كدة
لقيت نفسي زهقان
قولت انزل الشارع اتمشى
بس لقيته زهقان اكتر مني
قلت اقعد عالقهوة
لقيت ناس بتلعب طاولة
وناس بتلعب كونكان
الكل برضو قاعد زهقان
طلبت فنجان قهوة
بالمستكة والحبهان
جالي بس من غير وش
القهوجي قاللي يا استاذ معلش
متزعلش
انا فاكرك قولت عايز رمان
قلت مفيش بقى غير النيل
والحبيبة قاعدين
لا بزهق حاسين
ولا بالبرد دريانين
لقيت واحد و واحدة
ماشيين
وقعت منهم ضحكة
وصورة وورقة
وسمعت منهم كلمة بتقول
انا زهقان